Hoor hoe skop die middagwind stof op.

Dis mos 'n dag vir swartdoek dra.

Diep gekwes ruk en pluk hy 'n droë boom

vir die vullishoop waar bedelaars aas.

Kyk hoe skop die middagwind stof op.

Dis mos 'n dag uitgeknip vir rou.

Ma's van Afrika treur hulle harte

leeg oor die bloed wat in die stof kors,

oor die kinders wat vaal ashopies lê.

Kyk hoe droog die middagwind die trane af.

Drie dae swyg hy, voor hy stowwerig

opstaan en na sy Vader koers inslaan.

Hoor hoe skop hy middagstof op.