Ek vertrou die geagte respondente sal uitwys dat Evolusie strydig is met Verlossingsboodskap. Die kerk behoort haar lidmate te lei in die waarheid van die Woord. Die evolusieteorie van opwaartse verbetering van eenvoudige organismes na komplekse gewerweldes, soos deur Darwin voorgestel, voldoen nie aan die vereistes van die wetenskap nie. Daar is nie waarneming van eksperimente en resultate met herhaling van dieselfde uitkomste nie en dus bly dit net ‘n hipotese. Slegs die waarneming van sekere fenomene word in die hede gedoen en gevolgtrekkings daarvan word oor die verlede gedoen. Kortom, nog niemand het evolusie sien gebeur nie! Bakterieë wat bestand word teen antibiotika is nie evolusie nie en Darwin se vinke op die Galapagos eilande is 150 jaar later nog steeds net vinke al het hul snawelgroottes gevarieer. Verder kon geen wetenskaplike daarin slaag om ’n nuwe soort te skep deur middel van natuurlike seleksie wat deur Darwin voorgestel is as die meganisme van evolusie nie. Mutasies is ook nie die meganisme nie, want dit lei tot die vernietiging van organismes. Eintlik bly die meganisme wat veronderstel is om nuwe soorte te skep ’n misterie vir die wetenskap. Verder is lewe nog nooit in ‘n laboratorium gemaak nie. Vir hierdie en ander redes is die sogenaamde evolusieproses teenstrydig met die meeste natuurwette en daarom val dit in die kategorie van geloof. ‘n Uitspraak teen evolusie is dus nie ‘n uitspraak teen wetenskaplike teorieë nie. Die kerk het egter ‘n plig om haar lidmate te lei op die gebied van godsdiens en geloof. Die kerk glo in die Skepper-Verlosser-God. Evolusie is ‘n vreemde godsdiens wat nie God as Skepper of Verlosser erken nie en die kerk moet teen valse leerstellings gewaarsku word. Indien daar nie ‘n eerste Adam, geskape na die beeld van God was nie, was daar nie ‘n tweede Adam nodig wat moes sterf vir die eerste Adam en sy nasate, wat almal gesondig het nie. Ons moet ‘n keuse maak tussen die Bybel en die evolusiegodsdiens, daar is nie ‘n middeweg nie en die kerk behoort duidelik en maklik standpunt teen die evolusieteorie te kan inneem. Daar is nie plek vir die evolusiegodsdiens in die verlossingsboodskap van Jesus Christus nie. Indien die Bybel geïnspireerd is, het God in watter historiese konteks ook al, die korrekte skeppingsverslag vir die totale mensdom gegee. Die ontstaan en evolusie van alles uit niks deur natuurlike prosesse (wat nie bewys kan word nie) is duidelik teenstrydig met die boodskap in die Bybel van die Skepper-God wat vêrder alles in stand hou deur die woord van Sy krag. (Hebr 1:3). Die God wat alles geskep het behoort in staat te wees om ons te vertel hoe Hy dit gedoen het. Of God het alles gemaak soos Hy in Sy Woord aan ons meedeel of Hy het nie. In terme van opvoeding het die kerk ‘n plig om enige wanvoorstellings en leuens wat deur evolusie verkondig word, uit te wys. Gerrit Claassen

Die Bybel is net 'n storie boek ou dude. Hoekom sal jy dink die Bybel moet meer respek kry as die Koran? Islam is in elkgeval 1000 jaar ouer as jou Calvinistiese protestantse geloof. En dan verbeel ek my of gebruik jy die protestantse bybel ? hoe oud is die Bybel?

Die emosionele intelligensie en gedrag van die mens laat my soms neig om te glo dat die mens van 'n aap afkomstig is. Afrika verkondig dit immers met die Sterkfonteingrot waar sy inwoners vandaan kom. My vraag is egter, indien die mens uit slym gemaak is met basiese DNA boublokke op watter stadium het God in die mens Sy gees gegee sodat die mens self 'n drieënige wese sou wees en nie net 'n liggaam met 'n lewende siel soos al die diere nie? In Genesis 1:1 lê veel meer toegesluit as wat die wetenskaplikes verstaan omdat hulle na geologie en koolstofdatering kyk en nie na die Woord nie. Dit is interresant dat taalevolusie afwaarts evoleer en eenvoudiger taalstruktuur daarstel in kontras met die evolusieleer dat eenvoud tot kompleksiteit evoleer.